20-21-nji sentýabr aralygynda Aşgabatda Türkmenistanyň Garaşsyzlygynyň 32 ýyllygy mynasybetli ýurduň ykdysady üstünliklerine bagyşlanan sergi geçiriler diýip, Söwda-senagat edarasy habar berýär.
Söwda-senagat edarasynda (SSE) pawilýonlary serginiň çyzgysyna laýyklykda ýerleşdirmek, şeýle hem serginiň meýilnamasynyň taslamasyny taýýarlamak boýunça degişli işler alnyp barylýar. Serginiň guramaçylyk işine ýurdumyzyň ministrlikleri we pudaklaýyn dolandyryş edaralary, häkimlikler, jemgyýetçilik guramalary hem-de hususyýetçiler işjeň gatnaşýarlar.
Sergide energetika, senagat, oba hojalygy, ulag we aragatnaşyk pudaklarynda, ýangyç-energetika toplumynda, saglygy goraýyş, sport we syýahatçylyk, ylym-bilim we medeniýet ulgamlarynda gazanylan üstünlikler bilen tanyşdyrylar. Söwda-senagat edarasynyň Sergi merkezinde önümçilige innowasion tehnologiýalary ornaşdyrmak boýunça ýetilen sepgitler görkeziler. Şol maksat bilen tanyşdyrylyş dabarasy üçin ýörite meýdançanyň gurnalmagy göz öňünde tutulýar.
