Türkmenistanda «Energiýany tygşytlamak we energiýadan netijeli peýdalanmak hakynda» täze Kanun resmi taýdan çap edildi we güýje girdi. Bu Kanun ýurtda energiýanyň tygşytlanylmagyny höweslendirmegiň hem-de energiýadan peýdalanylmagynyň netijeliligini ýokarlandyrmagyň hukuk, ykdysady we guramaçylyk esaslaryny belleýär.
Kanun energiýany tygşytlamak ulgamyna degişli energetiki barlag, energetiki pasport, ýangyç-energiýa serişdeleriniň sarp edilmeginiň kadalary ýaly esasy düşünjelere kesgitleme berýär. Şeýle hem onda ýangyç-energiýa serişdelerini sarp edijileriň hukuklary we borçlary ýazylandyr.
Resminamada energiýany tygşytlamak babatynda hukuk taýdan düzgünleşdirmegiň esasy ýörelgeleri, şol sanda energiýany tygşytlamak babatyndaky çäreleriň geçirilmeginiň ylmy-tehniki we ykdysady taýdan esaslandyrylmagy, energiýa taýdan netijeli enjamlaryň, tehnologiýalaryň we materiallaryň ornaşdyrylmagynyň ileri tutulmagy barada bellenilýär. Energiýadan netijeli peýdalanmak babatynda halkara hyzmatdaşlygyna we maglumat üpjünçiligine aýratyn üns berilýär.
