Türkmenistanyň energetika pudagyny ösdürmek ugrundaky aýdyň wezipeleri üstünlikli durmuşa geçirmekde Derweze döwlet elektrik stansiýasynyň işçi-hünärmenleri hem saldamly goşant goşýar. Munuň şeýledigine elektrik stansiýasy boýunça 2021-nji ýylda elektrik energiýasyny öndürmekde gazanylan görkezijiler hem şaýatlyk edýär. Bu ýerde geçen ýylda 2 milliard 724 million 759 müň kilowatt/sagat elektrik energiýasy öndürildi. Munuň özi işçi-hünärmenleriň tutanýerli zähmeti netijesinde, öňki ýyl bilen deňeşdirilende, önümçilik işinde 104,5 göterim ösüşiň üpjün edilendigini görkezýär. Bu barada «Türkmenistan» gazetinde habar berilýär.
Aşgabat şäheriniň we Türkmenistanyň sebitleriniň ilatyny, degişli desgalary elektrik energiýasy bilen ygtybarly üpjün etmekde möhüm orun eýeleýän bu kuwwatly gazturbinaly elektrik stansiýasynda degişli döwürde öndürilen elektrik energiýasy sarp edijilere bökdençsiz iberildi. Geçen ýylda güýjenmesi 220 kW, uzynlygy 421 kilometr bolan «Ahal — Balkan» ýokary woltly täze asma elektrik geçirijisiniň işine-de hut şu elektrik stansiýasyndan dabaraly badalga berilendigini hem bellemek gerek.
