29-njy iýunda hormatly Prezidentimiz Serdar Berdimuhamedow Ministrler Kabinetiniň we Döwlet howpsuzlyk geňeşiniň bilelikdäki mejlisini geçirdi. Arkadag şäheriniň dabaraly açylyşyna taýýarlyk görmek mejlisiň esasy meselesi boldy diýip, TDH habar berýär.
Mejlise gatnaşyjylara Gahryman Arkadagymyzyň «Ömrümiň manysynyň dowamaty» atly eseri hem-de «Arkadag şäheri — geljegiň şäheri» atly neşir sowgat berildi. Bu kitapda täze şäherde ýerine ýetirilen gurluşyk işleri barada maglumatlar ýerleşdirilipdir, owadan fotosuratlar bolsa döwrebap binalaryň özboluşly aýratynlyklary barada gürrüň berýär. Üç dilde taýýarlanan we ýokary çaphana usulynda neşir edilen bu täze kitap giň okyjylar köpçüligi, şol sanda daşary ýurtly okyjylar üçin elýeterli bolar.
Bellenilişi ýaly, bu kitaplar ýurdumyzyň durmuşynda möhüm ähmiýeti bolan şanly wakalar mynasybetli ajaýyp baýramçylyk sowgadyna öwrüldi.
