21-nji iýulda Türkmenistanyň Bilim ministrliginiň Innowasiýa maglumat merkeziniň nic.gov.tm ady bilen resmi web sahypasy işe girizildi diýip, «Türkmenistan: Altyn asyr» internet neşiri habar berýär.
Web sahypasynda, Türkmenistanyň Prezidentiniň 2020-nji ýylyň 31-nji ýanwaryndaky Karary esasynda döredilen Türkmenistanyň Bilim ministrliginiň Innowasiýa maglumat merkeziniň wezipeleri barada umumy maglumatlar bar. Onda bilim pudagyna degişli türkmen, rus we iňlis dillerinde dürli maglumatlar saklanýar.
Şeýle hem sahypa Ýewropa sebitinde ýokary bilim boýunça hünär derejelerini ykrar etmek hakyndaky Konwensiýanyň düzgünlerini ýerine ýetirmek üçin merkeziň täze wezipeleri bilen baglanyşykly ähli meseleler barada maglumat berýär.
Şeýle hem bu ýerde daşary ýurtlarda berlen bilim resminamalaryny ykrar etmek barada maglumatlary tapmak mümkindir.
Daşary ýurtda bilim almagy meýilleşdirýän ýaşlar üçin Türkmenistanyň raýatlarynyň daşary ýurtlaryň ýokary we orta hünär okuw mekdeplerinde bilim almagy baradaky düzgünler bilen tanyşmak peýdaly bolar.
