Türkmen önüm öndürijileri ABŞ-nyň Halkara ösüş agentliginiň (USAID) goldaw bermeginde döredilen täze mediaplatformasyny peýdalanyp bilerler. Platforma eksport mümkinçiligini ösdürmek, önümiň hilini ýokarlandyrmak, halkara ülňülerine laýyk getirmek, marketing we dünýä bazarlaryna çykmak barada maglumat hem-de maslahat berer diýip, «Türkmenistan: Altyn asyr» habar berýär.
Taslama sebitleýin integrasiýany we söwda pudagynda hyzmatdaşlygy pugtalandyrmagy maksat edinýän USAID-iň Merkezi Aziýada söwda maksatnamasynyň bir bölegidir. Şeýle hem ol türkmen işewürliginiň sanly gurşawa, şol sanda elektron täjirçiligine, işewürlik boýunça tor programmalarynyň we multimediýanyň düzümine goşulmagyna mümkinçilik döreder.
