Türkmenistanyň Prezidenti Karara gol çekip, Energetika ministrligine Türkmenistanyň Döwlet energetika institutynyň ýanaşyk çäklerinde 2 müň orunlyk täze goşmaça okuw binasynyň, 800 orunlyk umumy ýaşaýyş jaýynyň, ýapyk görnüşli sport desgasynyň hem-de aýlawly ýolda monumentiň taslamasyny düzmek we gurmak barada «Röwşen» hususy kärhanasy bilen şertnama baglaşmaga ygtyýar berdi.
Şeýle hem resminamada görkezilen binalary we desgalary döwrebap enjamlar bilen üpjün etmek, ýanaşyk ýerleri abadanlaşdyrmek, elektrik, aragatnaşyk, gaz, suw üpjünçiliginiň we lagymyň meýdançadan daşarky eltiji inžener ulgamlarynyň hem-de desgalarynyň durkuny täzelemek ýa-da täzelerini gurmak, olary umumyşäher ulgamyna birikdirmek işlerini ýerine ýetirmek göz öňünde tutulýar.
Karara ýurdumyzyň energetika we senagat pudaklary üçin ýokary hünärli işgärleri taýýarlamak maksady bilen gol çekildi.
Resminamada gurluşyk işlerine 2023-nji ýylyň sentýabr aýynda başlamak hem-de binalary we desgalary 2025-nji ýylyň sentýabr aýynda ulanmaga doly taýýar edip tabşyrmak bellenildi.
Karar resmi metbugatda çap edildi.
