28-nji awgustda hormatly Prezidentimiz Serdar Berdimuhamedow Ministrler Kabinetiniň Başlygynyň obasenagat toplumyna gözegçilik edýän orunbasary T.Atahallyýewiň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi. Onda ýurdumyzyň oba hojalyk toplumynda hem-de welaýatlarynda ýerine ýetirilýän işleriň barşyna seredildi diýip, TDH habar berýär.
Degişli ýolbaşçylary welaýatlarda alnyp barylýan oba hojalyk işleriniň ýagdaýy, güýzlük bugdaý ekiljek meýdanlarda sürüm we tekizleýiş işleri, oba hojalyk tehnikalarynyň ýokary hilli tohumlaryň ekiş möwsümine taýýarlygy barada hasabat berdiler.
Döwlet Baştutanymyz hasabatlary diňläp, bugdaý ekişini ýokary hilli we agrotehniki möhletlerde geçirmek üçin ähli guramaçylyk meselelerini, şeýle hem ähli düzümleriň pagta ýygymy möwsümine taýýarlygyny berk gözegçilikde saklamagy talap etdi hem-de bu babatda her ýolbaşça anyk tabşyryklary berdi.
