1-nji sentýabrda, Türkmenistanda giňden bellenilýän Bilimler we talyp ýaşlar gününde ýurdumyzyň ähli bilim edaralarynda geçiljek ilkinji sapak şu ýylyň «Arkadag Serdarly bagtly ýaşlar» şygaryna bagyşlanar.
Asylly däbe görä, baýramçylyk Garaşsyzlyk binasyna we Ahal welaýatynyň Gökdepe etrabynyň Yzgant obasyndaky 27-nji orta mekdebiň çäginde ýerleşýän Berdimuhamet Annaýewiň ýadygärligine gül desselerini goýmak dabarasy bilen başlanar.
Baýramçylyk dabaralary Magtymguly adyndaky Ýaşlar guramasynyň Merkezi Geňeşi we Türkmenistanyň Bilim ministrligi tarapyndan guraljak «Bilim bagtly geljegiň binýadydyr» atly mowzuklaýyn maslahatlar bilen dowam eder diýip, «Türkmenistan: Altyn asyr» internet neşiri habar berýär.
