«Röwşen Gurluşyk» hususy kärhanasy Marydaky Türkmenistanyň Döwlet energetika institutynyň çäginde täze okuw binasynyň taslamasyny düzer we gurluşyk işlerini amala aşyrar. Türkmenistanyň Prezidenti Serdar Berdimuhamedow 25-nji awgustda geçirilen Ministrler Kabinetiniň mejlisinde degişli Karara gol çekdi.
«Röwşen Gurluşyk» HK Türkmenistanda iri gurluşyk taslamalarynyň durmuşa geçirilmegine işjeň gatnaşýar hem-de dürli maksatly we çylşyrymlykly desgalary gurmakda uly tejribä eýedir. Kärhana gurluşyk işlerine şu aýda başlar we 2025-nji ýylyň sentýabr aýynda tamamlar.
Ýatlasak, Marydaky Döwlet energetika instituty 1997-nji ýylda Ýokary tehniki kollejiň binýadynda döredildi we Türkmenistanyň elektroenergetika we senagat pudaklary üçin hünärmenleri taýýarlaýar.
2010-njy ýylda ýokary okuw mekdebiniň täze binasy ulanmaga berlipdi. Energetika institutynyň goşmaça okuw binasy 2 müň talyp üçin niýetlenendir, şeýle hem 800 orunlyk umumy ýaşaýyş jaýy, ýapyk görnüşli sport desgasy hem-de monument gurlar.
