22-nji sentýabrda hormatly Prezidentimiz Serdar Berdimuhamedow Döwlet howpsuzlyk geňeşiniň agzalarynyň gatnaşmagynda Hökümetiň giňişleýin mejlisini geçirdi.
Mejlisiň barşynda ýurdumyzy durmuş-ykdysady taýdan ösdürmegiň möhüm wezipeleri ara alnyp maslahatlaşyldy, käbir resminamalaryň taslamalaryna garaldy.
Türkmenistanyň Prezidenti Serdar Berdimuhamedow iş kesilen 1180 raýatyň günäsini geçmek hakynda Permana gol çekdi. Bellenilişi ýaly, Türkmenistanda günä geçmek çäresi däp boýunça möhüm milli we döwlet baýramçylyklarynyň öňüsyrasynda geçirilýär. Bu gezek iş kesilenleriň günäsini geçmek çäresi ýurdumyzyň Garaşsyzlygynyň 32 ýyllygy mynasybetli geçirilýär.
Şeýle hem hormatly Prezidentimiz Serdar Berdimuhamedow 1 müň 301 adamy Türkmenistanyň raýatlygyna kabul etmek hakynda Permana hem-de 265 adama Türkmenistanda ýaşamak üçin ygtyýarnama bermek hakynda Karara gol çekdi.
