Şu gün Türkmenistanyň Söwda senagat edarasynyň binasynda «Türkmenistanyň nebiti we gazy ─ 2023» atly halkara maslahaty we halkara sergisi öz işine başlaýar.
Bu giň möçberli çäräniň guramaçylary bolup Türkmenistanyň Söwda-senagat edarasy bilen hyzmatdaşlykda «Türkmengaz», «Türkmennebit» döwlet konsernleri, «Türkmengeologiýa» döwlet korporasiýasy, «Gaffney Cline» britan kompaniýasynyň goldaw bermeginde «Türkmen Forum» hojalyk jemgyýeti çykyş edýär.
Bu halkara çäresine döwlet edaralary, milli kompaniýalar we hususyýetçiler, şeýle hem Azerbaýjan, Gazagystan, Türkiýe, Amerikanyň Birleşen Ştatlary, Russiýa Federasiýasy, Birleşen Arap Emirlikleri, Hytaý Halk Respublikasy, Ýaponiýa, Malaýziýa, Beýik Britaniýa, Italiýa, Kipr, Ispaniýa, Germaniýa, Şweýsariýa, Singapur ýaly döwletlerden daşary ýurt kompaniýalary gatnaşarlar.
Maslahatyň gün tertibi baý tebigy serişdeleri netijeli peýdalanmak, energetika bazarlaryny we maýa goýum işini ösdürmek, täze ýataklary özleşdirmek, uglewodorod çig malyny gaýtadan işlemek, nebithimiýa, gazhimiýa, himiýa senagaty pudaklary we elektroenergetika, ekologiýa taýdan arassa önümçiligiň ornaşdyrylmagy, innowasion tehnologiýalary hem-de öňdebaryjy işläp taýýarlamalary çekmek we beýleki köp sanly möhüm meseleleri öz içine alýar diýip, Söwda-senagat edarasy habar berýär.
