4 – 6-njy mart aralygynda Aşgabatda owgan harytlarynyň sergisi we iki ýurduň wekilleriniň gatnaşmagynda işewürlik maslahaty geçirilýär. Çäreleriň dowamynda energetika ulgamynda hyzmatdaşlygyň meselelerine möhüm ähmiýet berildi diýip, TDH habar berýär.
Türkmenistan — Owganystan — Pakistan — Hindistan (TOPH) gaz geçirijisiniň we Türkmenistan — Owganystan — Pakistan (TOP) elektrik geçiriji ulgamynyň gurluşygy ýurtlaryň arasyndaky energetika ulgamyna degişli esasy taslamalardyr. Bu iri energetika taslamalary owgan ykdysadyýetiniň ösmegine we möhüm durmuş meseleleriniň oňyn çözülmegine ýardam eder.
Geçirilen çäreleriň dowamynda Türkmenistanyň hem-de Owganystanyň wekilleri energetika we beýleki ulgamlary hyzmatdaşlygy mundan beýläk-de ösdürmegiň mümkinçiliklerine ýokary baha berdiler.
Sergä söwda, gurluşyk, azyk senagaty, dokma önümçiligi, nebitgaz pudagy, oba hojalygy, ulag, lukmançylyk, ylym we bilim ýaly dürli pudaklara wekilçilik edýän 230-dan gowrak owgan kompaniýasy we firmasy gatnaşdy.
Sergi we maslahat ykdysady mümkinçilikler bilen tanyşdyrmak, göni aragatnaşygy ýola goýmak we türkmen-owgan hyzmatdaşlygyny işjeňleşdirmek üçin möhüm meýdança öwrüldi.
